Cartafol de actividade

Sendeirismo do mes de setembro

Sábado 28. Ruta de Lecer. De Barrañán a Baldaio, pasando por Caión

• Lonxitude: 14 km aproximadamente.
• Dificultade: baixa-media.
• Desnivel: baixo-medio.
• Hora de saída: ás 09:00 h., diante da piscina universitaria.
• Hora de regreso: ás 19:00h., aproximadamente.

Comezamos este novo curso cunha ruta de Lecer pola costa coruñesa. A ruta comeza na praia de Barrañán no concello de Arteixo e vai todo o rato preto da costa atravesando diferentes puntos de interese, como o portiño de Sorrizo, o lugariño de Cima da Vila, o santuario dos Milagres, a vila de Caión (concello de Laracha) e o complexo dunar de Baldaio (concello de Carballo), onde remata. O itinerario ten un alto interese paisaxístico e natural e gran parte del transcorre dentro de zonas da Rede Natura.

Aínda que a ruta está englobada dentro da programación de rutas de Lecer, non está exenta de desnivel como noutras ocasións e hai algunha que outra costa. O terreo polo que transcorre o percorrido é, en xeral, bo.

O santuario dos Milagres é unha obra do século XIX de estilo barroco compostelano. A súa construción levou 34 anos e suponse que, previamente, no lugar había unha igrexa románica. O 8 de setembro celébrase no santuario a Romaría dos Milagres de Caión, unha das máis importantes de toda a comarca de Bergantiños.

• MIDE da ruta de lecer de Barrañán a Baldaio
• Mapa da ruta de lecer de Barrañán a Baldaio
• Track GPS da ruta de lecer de Barrañán a Baldaio
• Track GPS da ruta de lecer de Barrañán a Baldaio (Comprimido)