Fundación USC Deportiva USC
Inicio > Actividades > Actividades > Cartafol de actividade

Cartafol de actividade

   

Sendeirismo na montaña de Riaño na Semana Santa

13,14,15 e 16 de abril.
Viaxamos á montaña de Riaño, un dos espazos naturais máis interesantes da provincia de León, considerado un dos portais de acceso aos Picos de Europa. Sen dúbida algunha, é un dos mellores lugares da cordilleira Cantábrica para realizar actividades de sendeirismo.

Consideracións a ter en conta

  • Ímos facer unha actividade de sendeirismo durante varios días, así que é importante estar acostumado a camiñar.
  • As rutas que faremos son en xeral de dificultade media, pero transcorren por zonas de montaña.
  • Cómpre levar calzado e vestimenta axeitados para facer sendeirismo.
  • A orde en que realizaremos as rutas dependerá das previsións meteorolóxicas xa que algunha das rutas baixo condicións meteorolóxicas adversas pode ser complicada.
  • A programación pode sufrir cambios ou variacións.
  • No hotel estaremos aloxados en réxime de media pensión, polo que tendes que levar a comida para as rutas.
  • En todo momento debemos seguir as indicacións dos monitores.
  • Probablemente fagamos algunha visita a centros de interpretación ou museos.

O  custe destas  visitas, en caso de habelo, non vai incluído no prezo da actividade.

1. Arredores do Pico Gilbo.

  • Lonxitude: 8 km.
  • Dificultade: baixa‐media
  • Desnivel: baixo ‐ medio

Este percorrido comeza no fermoso pobo de Horcadas, dentro do concello de Riaño, aos pés do pico Gilbo, unha das montañas máis emblemáticas da comarca.

É un itinerario sinxelo, de tipo circular, no que se poden observar unhas fermosas panorámicas. Transcorre por camiños en xeral cómodos, salvo algún punto, no que se pode atopar lama.

O guía comenta: «É a ruta máis relaxada das que faremos, rodeados de fermosas paisaxes».

Curiosidade: O Gilbo é unha montaña de modesta altitude, xa que ten 1.679 m, pero a súa morfoloxía fai que sexa unha das máis ansiadas polos montañeiros. A súa impoñente cara sur conta con varios itinerarios de escalada.

  • MIDE da ruta de Pico Gilbo
  • Mapa da ruta de Pico Gilbo
  • Perfil da ruta de Pico Gilbo

2. Puertos de Horcadas.

  • Lonxitude: 7 km.
  • Dificultade: media.
  • Desnivel: medio

Esta ruta comeza tamén en Horcadas. É un percorrido de tipo circular e nos leva ata os portos da zona. Goza de fermosas paisaxes e un alto interese natural.

Especial interese ten o tramo de descenso e regreso ao pobo, xa que se cruza pola Hoz Oscura, moi interesante dende o punto de vista xeolóxico.

Teremos ocasión nesta xornada, se o tempo o permitise  de intentar acadar o cumio  do pico Hato, de 1.749 m de altitude, que goza de boas panorámicas. Esta ascensión aumenta o grado de dificultade da ruta xa que implica facer uns 3 quilómetros a maiores e subir uns 200 m mais de desnivel (tanto de subida como de baixada). Esta ascensión é opcional.

O guía comenta: «Unha ruta curta, pero intensa en canto a paisaxe».

Curiosidade: A base económica da zona de Riaño foi durante moito tempo o gando.  No verán subíase aos portos (pasteiros altos da zona) como o de Horcadas, para que o gando pastase alí, xa que no verán estes pastos son os mellores.

  • MIDE da ruta de Puertos de Horcadas
  • Mapa da ruta de Puertos de Horcadas
  • Perfil da ruta de Puertos de Horcadas

3. Mirva e Rabanal

  • Lonxitude: 13km.
  • Dificultade: media.
  • Desnivel: medio.

A ruta comeza en Burón, localidade próxima a Riaño. É de tipo circular e goza dun alto interese paisaxístico e natural. Comeza percorrendo o val de Rabanal, por cómodos camiños, ao chegar ao final do mesmo, xa por sendeiro, comeza a ascensión ata o alto de la Giesta e o Prao Llao, onde gozaremos dunhas vistas excepcionais dos Picos de Europa. Logo faremos o descenso polo val de Mirva.

Haberá opción nesta ruta, si o tempo e as condicións o permiten, de intentar acadar o cumio de Parme dende Prao Llao. Isto incrementa de xeito notable a dificultade da ruta, xa que implica facer uns 5 quilómetros a maiores e un desnivel de 500m, tanto de subida como de baixada.

O guía comenta: «Posiblemente sexa a ruta máis bucólica de todas as que fagamos».

Curiosidade: Chaman a atención os fabulosos bosques de faias polos que  camiñaremos. Son un refuxio estupendo de corzos, cervos e xabaríns.

  • MIDE da ruta de Mirva e Rabanal
  • Mapa da ruta de Mirva e Rabanal
  • Perfil da ruta de Mirva e Rabanal

4. Pola serra de Hormas

  • Lonxitude: 17km.
  • Dificultade: media‐alta
  • Desnivel: medio‐alto.

Esta ruta circular comeza nas proximidades de Riaño, preto do encoro. Pouco a pouco vaise introducindo no val do río Hormas, onde predominan os bosques de carballos.

Ao final do val hai unha forte subida durante un quilómetro ata chegar a uns 1.700 m de altura. Aquí o sendeiro, cambia de rumbo, xa con escaso desnivel ata a collada Lechugal. As vistas son grandiosas. Na collada comeza o descenso tamén entre bosques.

O guía comenta: «Podemos considerar esta ruta como a etapa raíña. O esforzo verase recompensado polas estupendas paisaxes e os marabillosos bosques que cruzaremos»

Curiosidade: A serra de Hormas, situada ao norte de Riaño, acada alturas de 2.000 m. Son moi chamativas as dimensións dos bosques da serra, onde predominan os carballos.

  • MIDE da ruta de serra de Hormas
  • Mapa da ruta de serra de Hormas
  • Perfil da ruta de serra de Hormas

Estas andainas son unha actividade organizada polo Servizo de Deportes da USC.